۸ نوْیابر — بو گۆن آذربایجان تاریخینین ان شرفلی صحیفه‌لریندن بیری، ابدییته یازؽلمیش غلبه گۆنودور!
بو ظفر، آذربایجان میلتینین بیرلشمیش ایراده‌سینین، شانلؽ اوْردوموزون قهرمانلؽغینین و مۆستقیل دؤلت آغلؽنین پارلاق تنتنه‌سیدیر.
بۇ گۆن یالنؽز آذربایجان تاریخی توْرپاقلارینین آزادلؽغی دئییل — تاریخی عدالتین و میللی کیملی‌ییمیزین برپاسؽنین گۆنودور. قاراباغدا یازؽلان بۇ داستان، بۆتوو آذربایجان توْرپاقلاریندا آزادلؽق هارایؽنا و چاغؽریشینا چئوریلدی.
بۇ گۆن هر بیر آذربایجان تۆرکو غۆرورلا دئییر:
> بیز — آذربایجان تۆرکلری، غالیب بیر میلتیک!
>بیزیم مۆستقیل و گۆجلو دؤلتیمیز وار.
گۆنئی آذربایجان جۆمهورییت پارتیاسؽ (آ.ج.پ) اوْلاراق، بۇ مۆهتشم گۆنده اوْتایلی-بو تایلؽ بۆتون سوْیداشلاریمیزی، شانلؽ آذربایجان اوْردوسونو، عالی باش کوْماندان جناب ایلهام علیئفی تبریک ائدیر، شهیدلریمیزین مۆقدس خاطیره‌سی اؤنونده باشاَییر، قاضیلریمیزین آدؽنی ایسه تاریخین قؽزیل صحیفه‌لرینه هکک ائتدیییمیزی بَیان ائدیریک.
بۇ ظفر بیر داها گؤستردی کی: مۆستقیل و گۆجلو دؤلتین، میللی بیرلی‌یین، سارسؽلماز ایراده‌نین اوْلدوغو یئرده هئچ بیر قۆوه میلتی سؽندیرا بیلمز! هئچ بیر ایشغالچؽ وطنی آلا بیلمز.
اۇجا آذربایجان میلتی!
بۇ گۆن گۆنئی آذربایجانؽن سسی داها گۇر، آزادلؽق ایراده‌سی داها قۆدرتلیدیر.
بیز — گۆنئی آذربایجانؽن میللی سۇوئرئنلییینه، دئموْکراتیک حۆقوقلارینا و مۆستقیل گلجَیینه اینانانلار، بۇ مۆقدس یوْلو نه باهاسؽنا اوْلورسا-اولسون داوام ائتدیرجَییک.
آرازؽن ایکی ساحیلینی بیرلشدیرن میللی رۇح، تاریخیمیزین و گله‌جه‌ییمیزین ابدی رمزیدیر.
یاشاسؽن آذربایجانؽن دؤلتچیلیغیی
یاشاسین گۆنئی اۆچون آزادلؽق مبارزه میز و ایراده‌میز!
یاشاسؽن بۆتوو و غالیب آذربایجان!
گۆنی آذربایجان جۆمهورییت پارتیاسؽ (آ.ج.پ)
۸ نوْیابر ۲۰۲۵ — تبریز