یوز ایلدیر میلّی حوقوقلاری تاپدالانان، میلّی – ایرقی تعقیبلری ایله میلّی کیملیکیندن اوزاقلاشدیریلان، دئيَرلری الیندن آلیناراق اَریتمیه( آسیمیلاسیون) و فارسلاشدیرمایا معروض قالان، عزیز سویداشلاریمیز سئوگیلی میللتیمیز
معلوموم اولدوغو کیمی دونیانین خالقلار حبس‌خاناسی کیمی تانیدیغی ایران آدلی اؤلکنین“”جومهورباشقانی ایبراهیم رئیسینین اؤلومو دونیانین دقتینی یئنیدن جوغرافیامیزا یؤنلتمیشدیر ایللردیر ظولمه و سیتم اوزه رینده یوکسلمیش بو ائرقچی رئژیم ایبراهیم رئیسینین اؤلومو ایله نه قدر عجایب چوروک و لاخ بیر سیستم اولدوغونو بیر داها هر کسه گؤستردی.
بو حادثه ایله رئژیم بیر داها تصدیق ائتدی کی او نئکی ایراندا اسیر میللتلری همده اؤز جومهورباشقانینی قوروماق و موحافیظه ائتمک حتی اونون جنازه سینی بئله اؤز گوجو ایله تاپاجاق قودرتینده دئییل.
لاکین او مؤوجود آز گوجو ایله اسارته ساخلادیغی خالقلاری هر ساحه‌‌ده یوخ ائتمیه حاضر اولدوغونودا هر آددیمدا تصدیق ائدیر. ایران رئژیمی گوندن گونه سیاسی مییته(جنازه یه) دؤنن سیستمینه یئنیدن جان وئرمک و اؤزونون سیاسی عومرونو اوزاتماق اوچون هر تور چابا گؤسترمکده دیر بونون اوچون موختلیف سیاسی اویونلار قورور و اؤز سیاسی وارلیغینی مشروع گؤسترمیه چالیشیر.
۱. عزیز میللتیمیز بیلدیرمک ایستیریک کی بیز گونئی آذربایجان جومهوریت پارتیاسی، آذربایجان میلّی حرکاتینین ترکیبی اولاراق، ایللردیر میللتیمیزی هر ساحه ده اَزن، اونون بوتون مدنی سیاسی و میلّی حاقلاردان محروم ائده رک اؤولادلارینی دار آغاجلارینا چکن، میللی حاقلار اوغروندا موجادیلیه قالخمیش وطن‌سئور اؤولادلارینی حبسه و سورگونلره گؤندرن، قایناقلاریمیزی تالاییب فارس بؤلگه لرینین ریفاهینا صرف ائدن ۴۰ میلیونلوق آذربایجان تورکلرینی آنا دیلیندن مرحوم ائدن ، اؤولادلاریمیزا میلّی آدلاری قویماغی یاساقلایان، شهرلریمیزین آدلارینی فارسلاشدیراراق تاریخیمیزه و کئچمیشیمیزه اَل قویان، آذربایجان اراضیلرینی پارام پارچالایان، آذربایجان ائتنیک یاپیسینی ديَیشدیرمیه جهد ائدن بؤلگه میزده ایشسیزلیک و سوسیال پروبلئملرله اینسانلاریمیزی سیخینتیلارا سالان، اکینچیلریمیزی مالدارلاریمیزی باخمسئز و ورشکسته ائدن، آزربایجانلیلارین مین بیر زحمتله باغلاندیغللاری بوتون پئشه لرینی محو ائدن و بیر سوزده آذربایجانلیلارین انسان کیمی یاشاماق حاقلارینی اَللریندن آلان ایران دؤولتچیلیغینی و اونون مولّا رئژیمینی، آذربایجان تورپاقلاریندا ایشغالچی و غیری مشروع بیگانه گوج اولاراق تانیریق.
جومهورییتچیلر ایران دؤولتینین آذربایجاندا هر هانسی بیر عملینی ، قانونسوز اولاراق گؤروپ، اونون قوندارما سئچکیلرینه قاتیلیمی دا، هم اخلاقی، هم سیاسی هم ده میلّی باخیمدان خطالی و یانلیش اولاراق دئيَرلندیریر.
۲.گونئی آذربایجان جومهوریت پارتیاسی ایران آدلانان اؤلکده کئچیریلجک سؤزده سئچیملری مولّا رئژیمینین اؤزونه مشروعیت(لئگئتیملیک) ائدیلمسی اولاراق گؤروروک.
هر کسه معلومدور،کی ایران رئژیمینین خالقلار ایچینده آرتیق هئچ بیر دستک قایناغی و یئری یوخدور. بو گئرچکلیی ایرانین سون مجلیس سئچیملری و سون ایللرده باش وئرن اعتراضلاردا تصدیق ائتمیشدیر. رئژیم اؤز جانسیز و چوروموش سیاسی سیستمینه یئنیدن جان وئرمک اوچون هر طور چابا گؤستریر. خامئه ای نین اعتراف ائتدیی کیمی سئچکیلرده ایشتیراک ائتمک رئژیمین یاشاماسی اوچون واجیب و اؤنملیدیر.
رژیم اوزوده آچیق دییر کی اوز عومرونو اوزاتماغا چالیشماقدادیر. بیز گونئی آذربایجان جومهوریتچیلری ایران آدی آلتیندا سئچیملر ایله هر هانسی بیر شئین ديَیشمیجه یینه، هئچ بیر سورونوموزون حل اولمایاجاغینا و میللتیمیزین آغیر وضعيّتینین یاخشیلاشمییاجاغینا امینیک. بیز میللتیمیزی و ایراندا اسیر اولان میللتلری و عینی زاماندا دونیانیدا بونو آنلاماغا چاغیریر و ایران رئژیمینین قوردوغو بوتون سیاسی اویونلاردان اوزاق دورماغا سسلیریک.
۳.رئژیم سؤزده اصلاحطلب- اصولگرا – معتدل کیمی گوستریشلی سیاسی رقابت ایله سئچکی اویونو دوزنلییر، هم خاریجده هم ده داخیلده اؤزونه یئنی سیاسی فضا یاراتماغا چالیشیر. ۴۴ ایلده مولّا رئژیمی سؤزده سئچکیلرینده اؤز ایستدیغی آدایلاری(نامیزدلری) ایرلی سوروب، ساختا رقابتلر یاراداراق خالقیمیزین سسینی اوغورلاییب و خالقیمیزین سئچکیلردکی ایشتیراکیندان سوی ایستیفاده ائدیبدیر. تأسف اولسون کی رئژیمین بو حیله کار یؤنتمی ایستر ایستمز خاریجده و باتی دونیاسیندا دا قبول گؤرور.
ایللردیر بو ساختا سئچکی اویونو ایله دونیایا اؤزونو سئچیلمیش ومشروع بیر رئژیم کیمی گؤستریر و ایران آدلی اؤلکده جومهوریت سیستمینین حاکم اولدوغونا ایناندیریر. بو ساختاکارلیقلا رئژیم اولوسلاراراسی(جوامع بين المللی )سويّه‌ده ده، اعتبار و گوجونو آرتیراراق، اؤز موخالیفلرینه ، اسیر خالقلارا، باشدا آذربایجان تورک میللتینه قارشی داها سالدیرقان و باسقیجی داورانیر. ایران رئژیمی آرتیق بو گون دونیادا ایتن نوفوذونو هئچ جور برپا ائده بیلمیر بو فورصتی بیرداها رئژیمه وئرممه لیییک.
گونئی آذربایجان جومهوریت پارتیاسی بوتون سیاسی کسیملری باشدا آذربایجان میلّی حرکاتینی اویانیق اولماغا سسلییر.
۴. ۴۴ ایل بویونجا اولدوغو کیمی ایران رئژیمی بو دفعه ده سیاسی بیر سئچیم مهندیسلیغی ائدرک، سؤزده اصلاحطلب و کؤکنی تورک بیریسینین آدایلیغینی(نامیزدلیغینی) قبول ائدرک ساختا رقابتی آلوولاندیرماق ایستیر.
رئژیم آذربایجانلیلارین میلّی حیسّيّاتیندان اؤز منفعتلرینه اویغون فایدالانیب آذربایجان تورکونون ساندیغا گئتمسی ایله، ایرانین واحید و بؤلونمز اولدوغونو گؤسترمیه چالیشیر.
عینی زاماندا رئژیم یاراتدیغی ساختا رقابت موحیطی ایله تک دونیانی آلداتماغا چالیشمیر، بلکه هم بعضی موخالیفلرینی خنثی الییر، همده آذربایجان میلّی حرکتینی ایچریدن محو ائتمک و نهایت میلّی حرکتین فرقلی کسیملری آراسیندا ایختیلاف سالاراق اونو پارچالاماغا چالیشیر.
همچینین بو ایختیلافلار رئژیمین بؤیوک بیر سیاسی گوجه دؤنوشموش آذربایجان میلّی حرکتینی دونیایا اعتبارسیزلاشدیرماق اوچون قوردوغو آنتی تورک پلانینین اساس بیر پارچاسیدیر.
بیزه گؤره مسعود پئزئشکیان کیمی بیرینین تورک میلّی کیملیکینه هئچ بیر حالدا عایدیّتی یوخدور. چونکی تورک اولماق تکجه تورک آنا آتادان دوغولماق و یا تورکچه دانیشماق ایله دئییل، بلکه اصل تورک اؤز میللتینی و میلّیّتینی قئیدسیز شرطسیز سئون تورک میللتینین حاقلاری اوغروندا هر شرطده موجادیله وئرن حاقی ناحقه وئرمین اؤز جسارتی و فداکارلیغی ایله آنا وطنینین ایستیقلالیتی و ناموسونو قورویان، بیرینه دئییلیر.
بیز جومهوریتچیلر اولاراق، حاضردا ایران سیاستینده مؤوجود اولان رئفورمچو ،اصولچو گوروشلی و یا حتی تورک و آذربایجانلی کؤکنلی قوه لرین ایرانین سؤمورگچی سیستمینین پارچالاری و آذربایجان دوشمانی اولدوقلارینی اینانیریق.
امین اولاق کی پزئشکیان و یا هر هانسی بیریسی ایرانین ایشغالچی مرکزیتچی و گئریجی سیستمینین ترکیبینده نه آذربایجانی قورویا بیلر نه تورک میللتینین حاقلارینی گئری وئره بیلر، نه باتی(غربی) آذربایجانین ائتنیک ديَیشیمینی دوردورار ، نه اورمو گؤلونون محوین اؤنلر، نه میلّی قایناقلاریمیزین سؤمورولمه سینی یاساقلار، نه ده دیل و مدنيّتیمیزی قورومایا آلار!
عزیز میللتیمیز
گونئی آذربایجان تورکلرینین قورتولوشو ایراندا یوخ بلکه بو گون دونیادا آیاق سسلری ائشیدیلن توراندادیر. آذربایجان خالقینین خوشبختلیک آچارلاری تهراندا دئییل تبریزده دیر.
بیز بو گئدیشلری نظره آلاراق عزیز میللتیمیزی بو چتین دؤنملری بیر دفعه‌لیک آتلاتماق اوچون داها تمکینلی(احساسدان اوزاق) اولماغا، و ایران رئژیمینین بوتون اویونلاریندان اوزاق دورماغا سسلیریک.
ایرانچی ذهنیّتینین و فارس رئژیمینین ضعیفلدیغی بیر زامان و موباریزه میزین ثمره وئردیغی بو دؤنملرده بیز آذربایجانلیلار، ائلجه ده بوتون ایراندا اسیر میللتلر“ اینسانلارا حورّيّت میللتلره ایستیقلال” موباریزه فلسفه سینه صادق قالمالیق.
گونئی آذربایجاندا اینسانلاریمیز حورّيّته میللتیمیز ایسه ایستیقلالینا قوووشمادیقجا هئچ بیر سئچکی بیزیم میلّی ماراقلاریمیزا و میلّی منفعتلریمیزه خیدمت ائتمیجک هئچ بیر میلّی سورونوموز اؤز حلّینی تاپمایجاقدیر.
گونئی آذربایجان میلّی حرکتینین ایگید خانیملاری و بَئیلری
بیزلر چوخ یوروجو(فرسایئشی) بیر ساواشین ایچیندیک. چوخ حوققاباز و ظالیم بیر سیستمه قارشی موباریزه آپاریریق. بو سیستمه غالب اولماغین تک یولو سیستملی و تشکیلاتلی موباریزه دن کئچیر.
بیز گونئی آذربایجان جومهوریت پارتیاسی اولاراق سیزلرین هر بیرینی قوتسال میلّی ساواشیمیز یولوندا قوجاقلایب باغریمیزا باسیر و سئوگیلی و اسیر آذربایجانیمیز اوچون بیرلیکده سیستملی موجادیلیه سسلیریک .
بیز آذربایجان میللتی اولاراق بوتون فردی تشکیلاتی و طئیفی ماراقلاری کنارا آتمالی و بو سئچکی اوینونوندا کئچمیش اویونلار کیمی، سون مجلیس اویونون کیمی آلت اوست اولماسی یولوندا بوتون میلّی قوه لرله بیرلشمه لیک.
اینانیریق کی بیز بو بیرلیکله میر جعفر پیشه وری و میلّی حؤکومت بانیلرینین قانی و جانی باهاسینا موجادیله وئریب باشا چاتدیرا بیلمدیکلری میلّی حرکاتیمیزی اوغورا گؤتوره بیلجییک. بیز بو بیرلیک ایله گونئی آذربایجانا ایستیقلال میللتیمیزه ایسه ابدی آزادلیق بؤلگمیزه باریش و عدالت بخش ائده بیلجییک.
حؤرمتله ،گونئی آذربایجان جومهوریت پارتیاسی – آراشدیرما مرکزی