سایغؽلی سوْیداشلار، گۆنئیده قهرمان آذربایجان تۆرکلری!
ایران آدلؽ اؤلکهده جرَیان ائدن سوْن اوْلایلار — جینایتکار خامنئیینین اؤلومو و دؤلت قۇرولوشوندا باش وئرن کؤکلو سارسؽنتیلار — بؤلگهنین گلهجک دۆزهنینده یئنی بیر آشامانؽن باشلانغؽجیدیر.
اوْنیللیکلر بوْیو سۆرن، میلتیمیزین دوْغال حاقلارؽنی یوْخ سایان مرکزچی، شوْوینیست و باسقؽچی ادارهئتمه دۆزنی آرتؽق اؤز کئچرلیلییینی تامامیله ایتیرمیش و چؤکوش دؤنمینه گیرمیشدیر.
بۇ تاریخی کسیشمهده گۆنئی آذربایجان جۆمهورییت پارتیاسؽ (آجپ) اوْلاراق بیلدیریریک کی، اسکی و چۆروموش سیستئمین قالؽنتیلاری اۆزرینده قۇرولاجاق هر هانسؽ یئنی سییاسال قۇرولوش خالقلارؽن آزاد ایستهیینی قۇلاقاردینا وۇراراق اۇغور قازانا بیلمهز.
گۆنئی آذربایجاندا تۆرک اۇلوسو ایللردیر اؤز طالعیینی اله آلماسؽ، آنا دیلینده اؤیرتیم، ایقتصادی سۇوئرئنلیک و اۇلوسال کیملیک اۇغروندا آپاردؽغی قۇتلو ساواشؽ ایله اؤز سییاسال یئتکینلییینی قانؽتلامیشدیر.
ایندیکی دۇرومدا آماجیمیز سادهجه بیر رئژیمین دَییشمهسی دئییل، میلتیمیزین اؤز طالعیینی و گلهجهیینی بلیرلمه (حق تعیین سرنوشت-) حاقؽنین اۇلوسلاراراسی قانۇنلار چرچیوهسینده قازانؽلماسیدیر.
بو میللی و اۇلو اعمال اۇغروندا پارتیامؽز میلتیمیزی آشاغؽداکی اۇلوسال و میللی یوْل چیزگیسی چئورهسینده بیرلییه، ایتتیهاد و کنتلشمهیه سسلَییر:
۱.اۇلوسال پئکلشمه ،میللی بیرلیک (کوْنسولیداسییا): ایچ چکیشمهلره یئر وئرمهدن بۆتون سییاسال و توْپلومسال گۆجلرین تک بیر اۇلوسال چاتؽدا بیرلشمهسی.
۲.اؤزونویداره قۇرولوشلاری: شهر و کندلرده یئرلی اؤزونویداره اوْرگانلارینین و سیویل قوْرونما قۇروملارینین ان قؽسا زاماندا قۇرولماسی.
۳.قانونی و یاسال کئچرلیلیک: مۆباریزنین هر آددؽمیندا اۇلوسلاراراسی قانۇنلارا باغلؽلیق و دئموْکراتیک اینانجلارا سایغؽ دۇیولماسی.
۴.دیش سیاست و ائلچیلیک ایشلری: گۆنئی آذربایجانؽن حاقلؽ ایستکلرینین دۆنیا گۆجلرینه و اۇلوسلاراراسی قۇروملارا سیستئملی شکیلده چاتدؽریلماسی.
اوجا آذربایجان میلتی!
بۇ کئچید دؤنهمی قارؽشیقلیق، ایچ رقابت یا دا اینتیقام و اؤج آلما آشاماسؽ دئییل؛ بۇ، دؤلتچیلیک دۆشونجهسینین و میللی سوْروملولوغون اوْرتایا قوْیولمالی اوْلدوغو بیر واختدؽر.
بیز میلتیمیزین هر جۆر تحریک و قؽزیشدیرمالاردان اۇزاق دۇرماغا، سوْیوققانلیلیغی قوْروماغا، مۆتشکیل شکیلده ستراتئژی هدفلره کیلیدلنمهیه چاغؽریریق.
یوردداشلار، آذربایجانؽن قهرمان اوْغوللاری، اییید قؽزلاری !
تاریخ بیزه اؤز طالعییمیزی اؤز الیمیزله یازماق فۆرصتینی یئنیدن وئرمیشدیر. بۇ گۆن وئرجَییمیز قرارلار گلهجک نسیللریمیزین آزادلؽق و ریفاهؽنی بلیرلَیجکدیر.
بیزیم یوْلوموز آذربایجان اۆچون آزادلؽقدیر، آماجیمیز ایسه میللی دؤلتچیلییین اۇجالدیلماسیدیر.
قرار اۇلوسوندور!
گلهجک آذربایجانؽندیر!
گونئی آذربایجان جۆمهورییت پارتیاسؽ (آجپ)
۱ مارت ۲۰۲۶