عزیز گونئی آذربایجان تاجیرلری ، بازار صاحیبلری و صداقتلی اصنافیمیز!
بیلدیغینیز اوزره بوگون گونئیده آذربایجان میللتی چوخ آغیر اقتصادی چتینلیکلریله-اوز اوزه دیر.
ایران رئژیمی آزربایجانلی ایش آداملارینا قارشی، ایللردیر تطبیق ائتدیغی آیری سئچکیلیک سیاستلری و بازاریمیزا ائتدیغی باسقیلار نتیجه سینده،آذربایجانین اقتصادییاتی ضعیفلشدیریلمیش، آذربایجان تورکلرینی یوخسول و فقیر وضعییته سالینمیش و آذربایجانلی ایش اینسانلارینی و تاجیرلرینی جدّی چتینلیکلرله اوزلشمیشدیر.
سون ۱۰۰ ایلده، ایران دولتی اوز استعمارچی سیاستلری ایله، دواملی آذربایجان تاجیرلرینه قارشی وئرگی یوکونو آرتیریب، فارسلارلا قیاسدا، آذربایجان اصنافینا داها چوخ بانک و گؤمروک محدودییتلری قویموش، آذربایجانلیلارا قارشی تیجارت ایمکانلارینی یوخ ائدمیش، وطنیمیزین بوتون یئرآلتی و یئر اوستی ثروتلرینی تالان ائتمیش ثروتلریمیزی کیرمانا-اصفهانا،کؤچورموش(غارتی، تالاماسی)، تورکلرین ایش قایناقلارین قوروتموش، آذربایجانین گؤمروک و اکینجیلیک گلیرلرینی غصب ائدرک بیر باشا فارس خالقینین ریفاهینا و آزربایجان تورکلرینی کیملیکلرینی محو ائتمسینه خرجلمیش، آذربایجان تورپاقلارینی قوراقلیغا -چوللوغه چئوریب میللتیمیزی فارس بؤلگه لره(شهرلرینه) کؤچه(مهاجرته)مجبور ائتمیش و داها بیر چوخ ظولملر، کی آذربایجان و تورک میللتینی، بوگون کی فلاکتلی دورما گتیریب چیخارمیشدیر.
۱۳۰۴ شمسی ایلینده رضا پهلوی حاکیميّتی غصب ائتدیغی زامان، آذربایجان اقتصادی جهتدن تک ایران دا یوخ، بلکه بؤلگه ده بیرینجی یئرینه صاحبیکن، ایسلام اینقیلابی باش وئرنده ۱۱-جی یئره دوشموشدور. ایران ایسلام جمهوریتی ده، پهلویلرین آذربایجان تورکلرینه قارشی هرطرفلی دوشمنچیلیک سیاستلرینی داها شدّتلی دوام ائدیب و بونون نتیجه سینده بوگون آذربایجان ایالتلری ایقتصادی جهتدن اورتالاما ۱۹-جو یئره دوشموشدور.
غیرتلی تورک بازاریلر
سیزلرتاریخ بویو بؤلگه بازارینین دؤیونن اورگی و آذربایجانیمیزین اقتیصادی دیرچلیشینین اساس سوتونلاری و دیرکلری اولوبسونوز.
تاریخده گونئی آذربایجان بازارلاری، یالنیز تیجارت و ترانزیت مرکزی دئییل، هم ده میلّی دیرنیشین، میلّی موباریزه نین ، قورتولوش ساواشلارینین قالالاری(قلعه لری) اولوبدور.
مین ایللردیر کی تبریز باشدا اولماقلا ،زنگان،اورمو و اردبیل بازارلارینین سیاسی روللارینی و اهميّتینی دونیا بیلیر.
معاصر تاریخیمیزده ۱۹۴۵-جی ایلده میلّی حؤکومتین قورولوشوندا و ۱۹۰۵- ۱۹۰۹جی ایللرده مشروطه ایقلابیندا ، اصناف و بازاریلریمیز میلّی حرکاتیمیزین اساس سوتونلاریندان اولموشدورلار.
تاریخ ثبوت ائدیب کی آذربایجانین بازار و اصنافی اؤز میللتینین یانیندا اولدوقدا، میللتیمیز غالیب گلمیشدیر. دونن اولدوغو کیمی بوگونده، گونئی آذربایجانین آزادلیق موباریزه سینده، بازاریلریمیزین رولو و تاثیری عوضسیزدیر.
دییرلی وطنداشلار! بیز بیلملییک کی گونئی آذربایجان اؤز موستقیلّیک و جومهورییتینی قازاندیقدا، هم یئرلی تاجیرلر و ایش آداملاری همده بئین الخالق شرکتلر اوچون یئنی اقتصادی ایمکانلار یاراناجاق. مستقل گونئی آذربایجان دا، ایران رئژیمینین تطبیق ائتدیی محدودییتلر، ایستعمارچی و آیری-سئچکلیک سیاستلری آرادان قالخاجاق ، آزاد بازار اقتصادییاتی سوسیال دؤولت کناریندا فورمالاشاجاق. بو هم داخیلی همده خاریجی سرمایه اوچون چوخ سایلی اوستونلوکلر و یئنی ایمکانلار یاراداجاقدیر.
آزاد آزربایجاندا آزاد بازار ،آزاد سرمایه دولاشیمینی ، گئنیش تیجارت شبکه لر و اینکیشاف ائدن ایقتصادی آلت یاپی و بینُوره لر دئمکدیر. یئرلی تاجیرلر و آزربایجان ایش آداملاری داها راحت، ثابت گلیرلی، اُون گورولجک بیر اقتصادی محیطده فعالیّت گؤستره بیلجکلر.
عزیز هم وطنلر ! بیلیرسینیز کی گونئی آذربایجان چوخ اهميّتلی سیاسی-جغرافیایی بؤلگده یئرلشیبدیر. دونیادا بیر چوخ اهميّتلی اِنِرژی خطلری و گئچید یوللاری گونئی آذربایجان اراضیسیندن کئچیر. اگر بیز گونئیده موستقیل جومهورییت قورارساق، او زامان آذربایجانیمیز آوروپانین، عرب دونیاسنین، قافقاز و تورک دونیاسینین اقتصادی قاپیسی اولاجاق. یعنی ایستر ایستمز تورک دونیاسی ،تورکیه و اورتا آسیا اؤلکه’لری ایله گنیش و سربست (آزاد) تیجارت علاقه‌‌لری قورولاجاق. بودا ایلده میلیاردلارلا دوللارلیق سرمایه و گلیر(قازانج) دئمکدیر. اوزون ایللردیر کی آزربایجان اراضیسندن کئچن ترانزیت خطلریننین میلیاردلار دولار گلیری ایرانلیلارین جیبینه آخماقدادیر.
هر کس بیلیر کی گونئی آذربایجان ۳۰ میلیون جمعيّت ایله بؤیوک اینسانی سرمایه سی و ایش گوجو وار. گونئی آذربایجان محتشم طبیعتی، قدیم تاریخی ایله، بؤیوک توریزیم پتانسیله و قایناقلارا صاحبدیر. دوغرو اقتصادی لایحه لرایله، دقیق مدیریت ایله، و دوزگون تحصیل برنامه سیله، گونئی آذربایجان یوکسک ایختیصاصلی ایشچی قووه سینه صاحب اولوب و تکنولوژی صنایعی و خیدمت ساحه لرینده سرعتلی اینکیشاف باش وئره جکدیر.
عزیز بازاریلر ! اگر بیز موستقیل گونئی آذربایجانیمیزی قورارساق ، او زامان بیزیم بازار اورتا دوغو بازارینا آلتئرناتیو چئوریلجک و گونئی آزربایجان و تبریز یئنه اقتصادی مرکزه چئوریلجک .
گونئی آذربایجانین زنگین طبیعی ثروتلری ایله،نفت ،قیزیل،مرمر،لیتیم میس و گاز کیمس یاتاقلاری ایله، بؤلگه نین ان زنگین اؤلکسیدیر
یئتر کی بو ثروت اؤز صاحبلرینین الی ایله اداره اولونسون. موستقیل گونئی آذربایجان دولتی دوغرو اِنِرژی لایحه‌لری ایله ، وطنیمیزه بؤیوک سرمایه آخینینا سبب اولاجاق.
گونئی آذربایجان جومهورییت پارتییاسینین اقتصادی و تحصیل پروگرامینا اساساً ۱۰۰ ایل بویونجا دولت، آذربایجانین میلّی ثروتلریندن سادئجه۱/۳ اوچده بیرینی, ایستفاده ائتمه حاقینا صاحب اولدوغونو و گئری اوچده ایکیسی ۲/۳ ایسه گلجک نسیللره رزرو(ذخیره) اولونماسینی گرکلی ساییر. بیز جمهوریتچیلره گوره آزربایجانیمیزین سرعتله دیرچلیشی اوچون موستقیل و میلّی جومهورییتیمیزده ایش انسانلارینا وئرگی یوکونون آزالماسی گرکلیدیر و دؤولتین بازارا حمایتی اولمازسا اولمازدیر. گونئی آذربایجان جمهوریت پارتیسی بوتون میلّی ثروتلرین گلیری و ایش ایمکانلارینی میلّی مجلیسین و دولتین شفاف کنترولوندا اولماسینی گرکلی ساییر .
گونئی آذربایجان جومهورییت پارتییاسینین اقتصادی پروگملارینا اساسا ، گونی آزربایجان مختلط اقتصادی سیستم یعنی آزاد بازار و سوسیال دولت قاریشمی ایله اداره اولونورسا بو سیستم آزربایجان میلتینی سرعتله رفاها و اقتصادی زنگیلیغه اپاراجاق.
عزیز آذربایجان بازاری و اصنافلاریمیز. سیزلر بو میللتین قلبی اولاراق، اؤز اقتصادی گوجونوز و تأثیر ایمکانلارینیزلا خالقیمیزین حاق سسینی اوجالدا بیلر و میلّی ایستیقلال اوغروندا موباریزه میزه دستک وئره بیلرسینیز.
بیز بوتون آذربایجان تاجیرلر و ایش اینسانلارینی بیرگه امکداشلیق ائتمیه، گونئی آذربایجانین سیاسی و اقتصادی موستقیلّیغی اوچون بیرگه چالیشماغا – میلّی روحلو ایش اینسانلاریندان شبکه’لر یاراتماغا، اؤزلیکله غربی آذربایجاندا تورک ایش اینسانلارینا و ایشچیلره اوستونلوک وئرمغه و اؤز میللتیمیزین حوقوقلارینی مودافیعه ائدن فعالیتلره قوشولماغا چاغیریریق.
بیز میللت اولاراق بوتون صینفلریمیزله بیرلیکده اولارساق، نه ایران رئژیمینین اقتصادی باسقیلاری و نه اونلارین بیزه قارشی آپاردیغی سیاسی آیری سئچکیلیک و باسقیلاری بیزی سیندیرا بیلر.
سیزی گونئی آذربایجاندا میلّی حؤکومتیمیزین یئنیدن قورولماسی و ایشغالچیلاردان قورتولماق نامینه بیرلیغه و بازاریمیزین تئکرار آذربایجان میلّی حرکاتین سوتون و دیریی اولماغا سسلییریک.
بو گون بیر داها ثبوت ائتمک زامانیدیر کی گونئی آذربایجان دا تورک میللتی موستقیل یاشاماغا لایقدیر، اوزونو اداره ائتمک لیاقتی و پتانسیلی وار.
یاشاسین آزاد و موستقیل گونئی آذربایجان
یاشاسین میلّی آزادلیق یولوندد موباریزه میز
یاشاسین آذربایجان بازاری
گونئی آذربایجان جومهورییت پارتییاسی-اقتصادی قولو