۲۳ سئنتایابر – گۆنش تقویمی ایله خزل آیؽنین (مهر آیؽنین) ۱-جی گۆنو ایراندا و گۆنئی آزربایجاندا یئنی درس ایلی باشلایؽر. آنجاق بۇ گۆن بیزیم اۆچون بایرام دئییل، میللی فاجیعه‌نین سیمووْلودور.
چۆنکی آرتؽق اوْنلارجا ایلدیر کی، ۳۵ میلیوْندان چوْخ گۆنئی آزربایجان تۆرکو و عۆمومیلیکده اهالینین ۷۰٪-دن چوْخونو تشکیل ائدن غیر-فارس میلتلر آنا دیلینده تحصیلدن محرۇم ائدیله‌رک زوْراکی فارسلاشدؽرما سیاستینه معرۇض قالؽر.
آنا دیلیمیزه قوْیولان قاداغالار، دیلیمیزه ائدیلن تحقیرلر، دؤلت و محکمه دایرلرینده ایستیفاده‌سینین یاساقلانماسؽ، مکتبلرده یالنؽز فارس دیلینین تطبیقی — بۇنلارین هامؽسی آچؽق شکیلده میللی و دیل سوْیقیریمیدیر.
گونئی آزربایجان جۆمهورییت پارتیاسؽ اوْلاراق بیز بۇ سیاستی قطعیتله محکۇم ائدیر و قؽناییریق.
حقیقی آمارلار گؤستریر کی، ایران آدلؽ اؤلکه‌ده تحصیلی یارؽمچیق قوْیانلارین اکثریتی غیر-فارس میلتلرین اؤلادلاریدیر. اوْنلار درسی باشا دۆشمکده چتینلیک چکیر، تحصیل حیاتؽندان کنارلاشدؽریلیر و گله‌جکدن محرۇم ائدیلیرلر. بعضی عائله‌لر ایسه بۇ فاجیعه‌نی اؤنله‌مک اۆچون دؤلتین آسسیمیلیاسیوْن(ذوب و اَریتنه )سیاستینه بوْیون ایه‌رک اۇشاقلارینی زوْرلا فارس دیلینده دانؽشماغا مجبۇر ائدیرلر. بۇ ایسه خالقیمیزا قارشؽ تؤردیلن ان آغؽر جینایتلردن بیریدیر. آنا آتا اَلی ایله میللی -مدنی سوْیقیریم!
بیزیم مؤقعییمیز کسکین و دَییشمزدیر:
آنا دیلینده تحصیل درحال برپا ائدیلمه‌لیدیر.
میللی حؤکومتیمیزی ائل گوجو ایله برپا ائتمه‌لی، میللی کیملیغیمیزی، تاریخیمیزی و دیلیمیزی هر جۆر اَریتمک سیاستینه قارشؽ قوْرومالییق.
بیز بین الخلق اجتماعییتی،(جوامع بین‌الملل)اینسان حاقلارؽ تشکیلاتلارؽنی و مربوط قۇروملاری بۇ آچؽق حۆقوق پوْزونتولارینا مۆداخیله اِئتمه‌یه، ایراندا غیر-فارس میلتلره قارشؽ آپارؽلان سیستئملی آسسیمیلیاسیوْن و میللی – هویتی سوْیقیریم سیاستینی رسمی شکیلده تانؽماغا و قؽناماغا چاغؽریریق.
عزیز میلتیمیز! اوجالان تورک اولوسو
آنا دیلیمیزی و کیملیکیمیزی یاشاتماق هر بیریمیزین مۆقدس بوْرجودور. بیرلیک و دیرنیشله بۇ آسسیمیلیاسییوْن و اریتمه سیاستینه سوْن قوْیاجاق، میللی ایراده‌میزی و دؤلتچیلیک حاقؽمیزی برپا ائدجَییک.
یاشاسؽن آزربایجان
گۆنئی آزربایجان جۆمهورییت پارتیاسؽ
۲۳ سئنتایابر ۲۰۲۵