ایران کشفییات ناظیرلیغی (اطلاعات) و سیپاهئن کشفییات قۇرومونون سوْن واختلار یایدؽغی گۇیا “تحلۆکهسیزلیک” کاراکتئرلی بَیاناتدا اوْنلارلا مۆستقیل مئدیا قۇرومو، وطنداش جمعیتی تشکیلاتؽ و گۆنئی آذربایجانن میللی سیاسی تشکیلاتلارؽ اوْ جۆملهدن گۆنئی آذربایجان جۆمهورییت پارتیاسؽ (آ.ج.پ)، اوْغوز تیوی، آزوْح، گۆناز تیوی و حتی آذربایجان جۆمهورییتینین دؤلت تئلئویزییاسؽ آز تیوینین “جاسۇسلوق”دا ایتیهام ائدیلمهسی، ایران دؤلت قۇرولوشونون آذربایجانؽن پوْلاد
ایرادهسی قارشئسئندا یاشادؽغی درین قوْرخونو بیر داها اۆزه چئخارتدی. بۇ قارا سیاهؽ گۆج نۆمایشی دئییل، عکسینه میللی کیملیکلری بوْغماق و اوْرتا عصر اۆصوللو مۆستملکه نیظامؽنی داوام ائتدیرمکله آیاقدا قالماغا چالؽشان تحلۆکهسیزلیک آپاراتؽنین عاجیزلیغینین و هرطرفلی مغلۇبیتینین آچؽق اعتیرافؽدیر. ایران دؤلتی مۆستقیل مئدیا قۇروملارینی، وطنداش جمعیتی تشکیلاتلارؽنی و آذربایجانؽن سیاسی بیرلیکلرینی اؤزونون اۇیدوردوغو قانۇنلارا اساسلاناراق هدفه آلؽر، اوْنلارلا هر جۆر علاقهنی جینایت حساب ائدیرسه، بۇ هر شئیدن اول اوْنون ماهیتینی، خۆلیالارینی و آغؽر بحران ایچینده اوْلدوغونو ایفشا ائدیر.
دؤلتلرین و رئژیملرین داورانؽشینین تحلیلی باخؽمیندان، ایرانؽن شوْوینیست دؤلت نیظامؽنین درین داخیلی و بؤلگهسل بؤحرانلارلا سارسؽلدیغی بیر دؤورده بۇ جۆر تحلۆکهسیزلیک و امنیت تدبیرلرینین سرتلشدیریلمسی تصادفی دئییل.بۇ سیاهؽنین یایؽلماسی سوْن دؤورلرده باش وئرن کۆتلوی حبسلر، ایشگنجهلر و وحشیجسینه اعداملارلا بیرلیکده رئژیمین استرۇکتور و قۇرومسال سوییهده یاشادؽغی تشویشین و اؤز مؤوجودلوغونو تحلۆکه آلتؽندا گؤرمهسینین گؤستریجیسیدیر.
رئژیم اصلینده ایرانداکؽ میلتلر آراسؽندا قوْرخو یاراتماق، خالقلارؽ نظارتده ساخلاماق و میللی-مدنی فعالیتلری شیطانلاشدؽراراق باسقؽ آلتؽنا آلماق سیاستی گۆدمکله یاناشؽ اؤز قوْرخولارینی، بؤحرانلارینی، سیاسی اۇغورسوزلوقلارینی، حاکیمیت اۇغروندا گئدن داخیلی چکیشمهلرینی، کشفییات و تحلۆکهسیزلیک قۇروملارینداکی ساتقن شبکهلری، سوْن مۆحاریبه دکی حربی و ایقتصادی ایفلاصؽنی، ائلهجهده بۆتون ساحهلردکی هرطرفلی مغلۇبیتلرینی اؤرت-باسدیر ائتمک اۆچون چارهسیز جهد ائدیر.ایران دؤلتچیلیغینین تحلۆکهسیزلیک دوْکتریناسیندا باکؽ پوْتئنسیال دۆشمن، تبریز ایسه فاکتیکی دۆشمن کیمی تقدیم اوْلونور.چونکی گۆنئی و قۇزئی آذربایجان، هر ایکی وارلؽق ایرانؽن مۆستملکهچی و ایشغالچؽ نیظامؽنی سارسؽدیر.
ایران دؤلتچیلیغینین اساسلارؽ ماهیت اعتیباریله آذربایجانؽن میللی
وارلؽغینا قارشؽ دۆشمنچیلیک اۆزرینده قۇرولوب. بۇ سیستئم فارس مرکزچیلیغینه، کیملیک اینحیصارؽنا و غیر-فارس میلتلرینین حۆقوقلارینین اینکارؽنا سؤیکندییی اۆچون بۇ استرۇکتور دۆشمنچیلیغه سوْن وئرمهیهجک.بئله بیر قۇرولوشدا گۆنئی آذربایجانؽن تالانؽ، آذربایجان تۆرکلرینین کیملیگینین و تاریخینین آلچالدؽلماسی و قاداغان اوْلونماسی، میللی و مدنی فعالیتلره قارشؽ دۆشمنچیلیک داوام ائدهجک؛ دَییشن یالنؽز بۇ سیاستین آلت و واسیطهلری اوْلاجاق، ماهیتی دئییل.توْتالیتاریزم، آذربایجانؽن ایشغالؽ، تۆرک کیملیگینین سیلینمهسی و ایران مۆستملکهچیلیغی – ایستر ایسلام جۆمهورییتینین دینی ایستیبدادؽ فوْرماسیندا، ایسترسهده فارس میلتچیلیغیی، ایرانشهرچیلیک، ایران مرکزلی دولت و مرکزچیلیک آدؽ آلتؽندا – عینی تمهله سؤیکنیر: حاکیمیت اینحیصارؽ، تاریخین ساختالاشدؽریلماسی، میللی حۆقوقلارین اینکارؽ و ایشغالؽن داوام ائتدیریلمهسی.
ائله بۇنا گؤرهده فارس دیللی مۆخالیفین اهمییتلی حیصّهسیده گۆنئی آذربایجانؽن میللی حۆقوقلارینا، مۆستقیل آذربایجان جۆمهورییتینه و تۆرک کیملیغینه قارشؽ چؽخماقدا بعضا ایسلام جۆمهورییتیندن بئله داها رادیکال و داها کینلی مؤقع تۇتور.بو سببدن، ایران داخیلینده و مۆخالیفینده فعالیت گؤسترن مۆختلیف سیاسی جرَیانلار حاقؽندا مؤوجود بیلیکلر گؤستریر کی، بۇ اساس استراتئگیا دَییشمهیهجک.لاکین ان مۆهوم و تحلۆکهلی مسئله اوْدور کی، ایستر “ایران” آدلانان جوْغرافیانین داخیلینده، ایسترسهده خاریجینده بعضی شخصلر و جرَیانلار بۇ دۆشمنچیلیغین کؤکونو یالنؽز ایسلام جۆمهورییتینده، سئپاه-دا و یا پزئشکیان، خامنه ای، پهلوی کیمی شخصلرده آختارؽر، پرئزیدئنتین، رئژیمین و یا مۆعیین قۇروملارین دَییشمهسی ایله ایران دؤلتینین قۇزئی و گۆنئی آذربایجانا قارشؽ یۆز ایللیک دۆشمنچیلیغینین سوْنا چاتاجاغؽنی دۆشونورلر.بو یاناشما نه تاریخی تجرۆبه ایله، نهده ایران دؤلتینین ماهیتینین دۆزگون درک ائدیلمهسی ایله اۇیغون گلیر.
سوْن یۆز ایلین تاریخی ثۆبوت ائدیب کی، ایران دؤلتچیلیغی، اوْنا حاکیم اوْلموش بۆتون رئژیملر (شاهدان شئیخه کئچیدده داخیل اوْلماقلا) و فارس مۆخالیفینین بؤیوک حیصّهسی ان ابتدایی مسئلهده – آذربایجانؽن کیملیگینین، توْرپاغینین و میللی حۆقوقلارینین مۆستملکه آلتؽنا آلؽنماسی مسئلهسینده – عینی مؤقعده اوْلوب و بۇ گۆنده همین مؤقعده قالؽرلار.
بۇنا گؤره ده پزشکیان کیمی شخصلرین حاکیمیته گلمهسی، رئژیمین دَییشمهسی، ان ایدهآل سیاسی سیستئمین قۇرولماسی، ایران دؤلتینین باشؽنا ان میللییتچی آذربایجانلؽنین کئچمهسی، حتی تامامیله آذربایجانلؽ تۆرکلردن عیبارت حؤکومتین فوْرمالاشدیریلماسی بئله، ایران دؤلتچیلیغینین تمَلی دَییشمدیکجه هئچ بیر چؽخیش یوْلو اوْلمایاجاق.
چۆنکی اؤتن عصرده شاهئن یئرینی شئیخین تۇتماسی، رئژیملرین دَییشمهسی، اوْنلارلا پرزیدئنت و حؤکومتین عوضلنمسی، یۆزلرله آذربایجانلؽ منشألی شخصین ایران دؤلتینده یۆکسک وظیفهلره گلمهسی گۆنئی آذربایجانؽن هئچ بیر اساس پروْبلئمینی حل ائتمهدی و بۇ دۆشمنچیلیکدن بیر آددؽم بئله گئری چکیلمه باش وئرمهدی.آذربایجان تۆرک میلتینین پروْبلئمی نه یالنؽز مۆعیین سیاسی قانادلا، نه مۆعیین حؤکومتله، نهده تکجه بیر رئژیمله باغلؽدیر.
پروْبلئم ایران دؤلتچیلیغینین ماهیتی ایله باغلؽدیر؛ اؤز مؤوجودلوغونو آذربایجانؽن اینکارؽ، آسسیمیلیاسییاسؽ و اریدیلمهسی، ائلهجهده مۆستملکه آلتؽندا ساخلانؽلماسی اۆزرینده قۇرآن بیر سیستئمله. ایسلام جۆمهورییتینین و یا تئرروْرچو سپاهین آرادان قالخماسؽ دا بۇ سیستئملی دۆشمنچیلیغی اؤز-اوزونه سوْنا چاتدؽرمایاجاق.
چۆنکی ایرانؽن سیاسی و “میللی” کیملیگی، ائلهجهده اوْنون تاریخی دؤلتچیلیک مدلی آذربایجان تاریخینین، کیملیگینین و دؤلتچیلیک حۆقوقونون اینکارؽ ایله آیرؽلماز شکیلده باغلؽدیر.بو گۆن ایرانؽن دوْکتریناسیندا قۇزئی آذربایجاندا میللی دؤلتین یاشاماسؽ و گۆنئی آذربایجاندا مۆستقیل دؤلت طلبینین گۆجلنمهسی ایرانؽن مۆستملکهچی نیظامؽنین سارسؽلماسی و نهایت سوْنا چاتماسؽ دئمکدیر.
محض بۇنا گؤره ده مؤوجودلوغونو ایشغال و اینکارا سؤیکَین بئله بیر سیستئمله داواملؽ صۆلح مۆمکون دئییل. یئگانه چؽخیش یوْلو آذربایجان تۆرک میلتینین مۆستقیل ایرادهسینه سؤیکنمک، میللی اینستیتۇتلاری گۆجلندیرمک و مرکزین مۆستملکهچی مئخانیزملریندن تام شکیلده قوْپماقدیر.
گونئی آذربایجان جۆمهورییت پارتیسؽ- تحلیل و آراشدؽرمالار شعبهسی
