یوز ایلدیر میلّی حوقوقلاری تاپدالانان ، عزیز سویداشلاریمیز ! سئوگیلی میللتیمیز
معلوم اولدوغو کیمی خالقلار حبس‌خاناسی کیمی تانینان ایران آدلی اؤلکه’نین“جومهورباشقانی” ایبراهیم رئیسینین اؤلومو دونیانین دقتینی یئنیدن جوغرافیامیزا یؤنلتمیشدیر. ایران فلاتیندا باش وئرن سون اعتراضلار و ائلجه ده رئیسی حادثه‌‌سی گؤستردی کی ، رئژیم نه’اینکی ایراندا اسیر میللتلری ، هم ده اؤز جومهورباشقانینی قوروماق و موحافیظه ائتمک حتی اونون جنازه سینی بئله اؤز گوجو ایله تاپاجاق قودرته صاحیب دئییل .
آرتیق هرکس رئژیمین نه قدر ضعیف، چوروک و لاخ بیر سیستمه صاحب اولدوغونو گؤردو، ایران رئژیمی گوندن-گونه سیاسی مئییته(جنازه’یه) دؤنن سیستمینه یئنیدن جان وئرمک و اؤزونون سیاسی عومرونو اوزاتماق اوچون موختلیف سیاسی اویونلار قورور و اؤز وارلیغینی مشروع(لئگئتیم) گؤسترمیه چالیشیر.
عزیز میللتیمیز، بیلدیرمک ایستییریک کی بیز گونئی آذربایجان جومهورییت پارتیاسی آذربایجان میلّی حرکتینین بیر پارچاسی اولاراق، ایللردیر میللتیمیزی اَزن، اونو بوتون مدنی سیاسی و میلّی حاقلاریندان محروم ائدرک اؤولادلارینی دار آغاجلارینا چکن، بو حاقلار اوغروندا موجادیله وئرن وطن‌سئور اؤولادلارینی حبسه و سورگونلره گؤندَرن، قایناقلاریمیزی تالاییب فارس بؤلگه’لَرینین ریفاهینا صرف ائدن، ۴۰ میلیونلوق آذربایجان تورکلرینی آنا دیلیندن محروم ائدن، اؤولادلاریمیزا میلّی آدلاری قویماغی یاساقلایان، جغرافی تورک آدلارینی فارسلاشدیراراق تاریخیمیزه و کئچمیشیمیزه ال قویان، آذربایجان اراضیلرینی پارام پارچالایان، آذربایجان ائتنیک یاپیسینی ديَیشدیرمیه جهد ائدن بؤلگه میزده ایشسیزلیک و سوسیال پروبلئملرله اینسانلاریمیزی سیخینتیلارا سالان، طبیعتیمیزی یوخ ائدن اکینچیله ریمیزی پریشان ائدن مین بیر زحمتله قورولان بوتون اقتصادی پئشه له رینی اؤلدورن و بیر سوزده آذربایجانلیلارین اینسان کیمی یاشاماق حاقلارینی الریندن آلان ، ایران دؤولتچیلیغینی و اونون مولّا رئژیمینی گونئی آذربایجان تورپاقلاریندا-غئیری مشروع و ایشغالچی گوج اولاراق تانیریق.
بیز جومهورییتچیلر ایران دؤولتینین قوندارما سئچکیلرینه قاتیلیمی دا، هم اخلاقی هم سیاسی هم ده میلّی باخیمدان، خطالی و یانلیش اولاراق ديَرلندیریرک.
بیز گونئی آذربایجان جومهورییتچیلری، ایران آدی آلتیندا سئچیملر ایله هر هانسی بیرشئیین ديَیشمیجغینه، هئچ بیر سورونوموزون حل اولمایاجاغینا، میللتیمیزین آغیر وضعيّتینین یاخشیلاشمییاجاغینا امینیک.
محض بونون اوچون میللتیمیزی ایران رئژیمینین بوتون اویونلاریندان اوزاق دورماغاچاغیریریق.
بیز آذربایجان میللتچیلری اولاراق بوتون فردی تشکیلاتی و طئیفی, ماراقلاری کنارا آتمالی و بو سئچکی اویونونون دا، کئچمیش بوتون ایرانچیلارین اوینلاری کیمی، سون مجلس سئچیملری اویونو کیمی، آلت-اوست اولماسی یولوندا بوتون میلّی قوووه لرله بیرلشمَلیییک.
اؤزاَلیمیز اؤز باشێمێز
یاشاسین بۆتؤۉ آزربایجانێمێز
گونئی آذربایجان جومهوریییت پارتیسی (آجپ)