عزیز قهرامان آذربایجان تورک میللتی!
سون گونلر سالماسدا باش وئرن اولایلار و بو اولایلارلا ایلگیلی اورادا خالقیمیزا قارشی باشلادیلمیش هوجوملار بیزی بیر میللت اولاراق بیگانه قویا بیلمز !
بو سببدن سالماس یالنیز سنی منی یوخ ! بوتون قهرامان میللتیمیزی بیگانه قالماماغا سسلَییر.
ایران آدلانان ایستیلاچی رئژیمین ایشغالچی و قولدور قوووه لری، آتا یوردلاریمیزی محو ائتمکدن آنا وطنیمیز آذربایجانی تالاماقدان دویمور.
خوصوصاً سون گونلرده ایرانین تالانچی رئژیمی، سالماسین قارا قشلاق)قره قشلاق )کندینده کارخانه (شوشه و دوز فابریکی)آچماق مقصدی ایله بوراداکی اینسانلاریمیزین حیات و یاشام آخیملارینین ضدینه فعالیّتلره باشلامیشدیر.
“ ایران حؤکومتی” پلانلادیغی کارخانه نین اراضیسیندکی یئرلی تورکلری قوواراق بو اراضیلری اله کئچیرمکله یاناشی، فابریکین اورتیمی(تولیدی) اوچون خام ماده‌نی سالماس و اورمو معدنلریندن غارت ائتمغی، اورادا عمله گلَجک چیرکاب و زیبیل قالینتیلارینی ایسه، یئنده سالماس و اطرافینداکی اراضیلره،یعنی آذربایجان طبیعتینه بوراخماغی، فابریکدن الده اولوناجاق گلیر و قازانجلاری ایسه ایستیثمار سیاستینه اویغون مرکزه و تهرانا گؤندرمغی هدفلَییر .
قهرامان قارا قشلاق اهالیسینین اؤز ساغلیق و ریفاهی اوچون ائتدیگی اعتراضلارا، مولا رئژیمی اَن سرد شکیلده جاواب وئرمکده دیر .
ایران شووینیست مولا رئژیمی، میللتیمیزین بو دینج اعتراضلارینا یئنه گولله و ديَه‌نکلرله، تام اؤز خیصلتینه اویغون وحشیلیک تؤرئدَرَک جاواب وئرمیشدیر.
اؤز آتا تورپاقلاریندا ،حوقوق و حاقلارینی طلب ائتمکله رفاهدا یاشاماغی اوچون موجادیله وئرن ساده اینسانلاریمیزین قانی، رئژیم طرفیندن یئنیدن آخیدیلمیشدیر.
بئلجه ساده بیر اعتراضا گؤره اونلارجا وطن‌سئور یورد سئون قورخماز ایگید بَئیلریمیزله یاناشی، خانیم و قیزیلاریمیز دا دؤیولرک حبس اولونموشدور .
گؤروندویو کیمی ایران رئژیمی چوخ آزغینلاشمیش، نه اینکی میلّی حاقلاری اوغروندا موباریزه آپارانلارا، هم ده ساده امکچی خالقادا گولله سیخماقدان ،حبس ائتمکدن، خانملارا هتک حرمت آلماقدان چکینمه میشدیر.
بیز آذربایجان جومهوریییتچیلری اولاراق بوتون آذربایجان تورک میللتینی، سالماس اولایلاریندان درس چیخارماغا، میللتیمیزه دوشمن موناسیبتی سرگیله ین رژیمه قارشی داها جسارتلی اولماغاسسله ییریک، اؤزلیکله آذربایجان میلّی آزادلیق حرکاتینین گوجونه ایناناراق میللتیمیزی موباریزه بیرلیغینه چاغیریریق.
بیز اینانیریق کی، میلّی گوجون و ایراده نین قارشیسیندا بوتون گوجلر عاجیزدیر.
آرتیق ایشغالچیلیق قوووه لرینه دوردورماق زامانی چوخدان گلیب چاتیبدیر .
بونون اوچون آذربایجان میلّی حرکاتینین هم میللتیمیزه بیگانه اولان ایران قوووه لری تورپاقلاریمیزدان چیخارماغا، هم آذربایجان تورک میللتینی،قوروماغا هم ده میلّی دؤولتینی قورماغا یئترینجه گوجو مؤوجودور .
بو اولایلار گؤستریر کی ، میلّی ایراده و میلّی بیرلیغه صاحب اولدوغوموز گون آذربایجان تورک میللتی آزاد اولاجاقدیر .
اوجا میللتیمیزی بونلاردان درس آلاراق گوجلنممیز اوچون میلّی هدفلر اوغروندا میلّی بیرلیغه سسلَییریک .
گونئی آذربایجان جومهورییت پارتیسی