“ای قهرمان تۆرک قادؽنؽ سن یئرده سۆرۆنمه‌یه یوْخ، بلکه چیگین‌لر اۆستۆنده گؤیلره اوجالماغا لایؽق‌سان”
مصطفی کمال آتاتۆرک
ایگید آزربایجان قادینلاری
سیزی بوتون آذربایجان قادینلارینی ۸ مارت – دونیا قادینلار گونو موناسیبتیله صمیمی اورکدن تبریک ائدیریک .
سون ۱۰۰ ایل ایران ایشغال دؤورونده ، آذربایجان قادینلاری گونئیده ، حیاتین بوتون ساحه‌‌لَریندن دیشلانمیش، بوتون اینسانی حاقلاریندان محروم بوراخیلمیش، هر طرفلی تحقیر، آیری -سئچکیلیک، جینسيّتی شدّته معروض قالمیشدیر .
آذربایجان قهرمان قادینلاری ، بوتون ایران ایشغال دؤورونون باسقیلارینا باخمییاراق ، آذربایجان تورکلرینین میلّی ديَرلرینه صادق قالماقلا ، آنادیلیمیزین ،مدنيّتیمیزین، کیملیک و تورکلویوموزون، عنعنه و معنویّاتیمیزین کئشیکچیسی اولوبلار .
بونونلا برابر ، آذربایجان تاریخینین قیزیل و شانلی صحیفه‌‌لری جسارتلی، ایرادلی، ،گؤرکملی ،زکالی، یوکسک لیاقتلی قادینلاریمیزین آدلاری ایله بزَنیب .
کئچمیشدن-گونوموزه آذربایجان قادینین توکنمز یئتنکلری(استعدادلاری) و پتانسیللری ایله ، آذربایجان خالقی بؤیوک امپراطوری لر یولا سالمیش، بؤیوک سیاسی -اجتماعی-علمی نائلیّتلره ایمضا آتمیش، شرقده و ایسلام عالمینده ، جومهورییت کیمی و میلّی حؤکومت کیمی دؤولتلر قورموشدور .
عزیز آذربایجان خانیملاری
هر توپلومدا (اجتماعدا) ، میللتین و اؤلکنین اینکیشافی قادینلارین اینکیشافیندان آسیلی اولدوغو کیمی ، قادینلارین اؤزغورلویو و گئلیشیمیده میللتین و وطنین باغیمسیزیلیقیندان آسیلیدیر .
امین اولاق کی گونئیده آذربایجانین باغیمسیزلیغی ،آزادلیغی بوتون سوسیال(اجتماعی)، سیاسی و فرهنگی پروبلئملری، قادینلارمیزین میلّی داوایا قاتیلیمی ایله حل اولاجاقدیر.
آذربایجان تورک میللتینین بو چتین گونونده آذربایجان قادینلارینین بویوک و چتین مسؤلیتی وار. یئنی آذربایجان نسلینین تورک کیملیکی و آذربایجانچیلیق ایدییاسینا باغلیلیق روحوندا تربیتینده ،آنالاریمیز و آزربایجان قادینینا بویوک ایش دوشور.
وطنیمیز گونئی آذربایجانین موستقیلّیک موباریزه سینده غلبه سی، ائلجه آذربایجانین بوتؤولویونون برپاسی، سیز ایگید قادینلارین ،آنالارین ،باجیلارین ، حیات یولداشلارینین بیلینجی و فداکارلیقلاری ایله اولاجاق .
بیز گونئی آذربایجان جومهورییت پارتیسی اولاراق گونئیده آذربایجان قادینلارینی جومهورییتچیلیک ایدئاللارا صاحب اولماق اوچون اؤز سیرالاریمیزا دعوت ائدیر و بیزیمله بیرلیکده میلّی موجادیله میزه صاحب چیخماغا چاغیریریق . یانلیز آزربایجان جمهوریتی بیزیم بوتون میللی ، سیاسی، توپلومسال، اقتصادی ، فرهنگی، حقوقی پروبلرمیزی حل ائدجک.
بایرامینیز موبارک
گونئی آذربایجان جومهورییت پارتیسی/ سوسیال پولیتیکالار قورولو