اۇجا تۆرک میلتی!
بؤیوک گۆنئی آذربایجان ائللری!
بۇ گۆن تاریخیمیزین ان شانلؽ، ان اۇجا صحیفهلریندن بیری – ۲۱ آذر میللی حؤکومتینین یارانماسؽنین ۸۰-جی ایلی تامام اوْلور. بۇ مۆقدس گۆن، گۆنئی آذربایجانؽن آزادلؽق فریادؽ، میلتیمیزین بیر یۇمروق اوْلوب آیاغا قالخدؽغی، تۆرکلوک و آذربایجانچؽلیق رۇحونون گؤیلره اۇجالدیغی گۆن کیمی یادداشتلارؽمیزدا ابدی یاشایؽر.
۲۱ آذر میللی حؤکومتی قؽسا مۆدتده میلتیمیزه سئوینج، غۆرور و بؤیوک اۆمید گتیردی. آنا دیلیمیز دؤلت ادارهلرینده ائشیدیلدی، مکتبلریمیزده تۆرکجه درس کئچیلدی، گۆنئی آذربایجان تۆرکونون اؤز طالعیینه صاحیب چؽخماق ایرادهسی بۆتون دۆنیایا بَیان اوْلوندو. عمرۆ آز اوْلسا دا، میلتیمیزین کؤنلونده عصرلر بوْیو سؤنمهیهجک بیر اوْد، بیر ایشؽق یاندؽردی.
بو گۆن بیز، آجپ اوْلاراق بیر داها بیلدیریریک:
– ۲۱ آذر رۇحو یاشایؽر و یاشایاجاق!
– تۆرکلوک و آذربایجانچؽلیق ایدهسؽ گۆنئی آذربایجاندا هئچ واخت سؤنمهیهجک!
– میللتیمیزین میللی حاق و هۆقوقلاری اۇغروندا مۆباریزمیز دۇرمایاجاق، داها دا گۆجلنهجک!
بیز آ.ج.پ اوْلاراق قطعیتله وۇرغولاییریق کی، گۆنئی آذربایجان تۆرکلری اؤز دیلینده، اؤز کیملیغیینده، اؤز توْرپاغیندا آزاد، مۆستقیل و لَیاقتلی یاشاماق حاقؽنا مالیکدیر. بۇ حاقؽ هئچ بیر قۆوه بیزدن آلا بیلمهز و آلمایاجاق!
بۇ مۆقدس گۆنده میلتیمیزین بۆتون اؤلادلارینی بیرلیک، دیرلیک و همرایلیک ایچینده اوْلماغا چاغؽریریق. بیز بیر اوْلساق، گۆجلو اوْلساق، میللی کیملیییمیزه و مۆقددراتیمیزا صاحیب چؽخساک – ۲۱ آذرین مشعلی داها گۇر یاناجاق، یوْلوموزو داها پارلاق ایشؽقلاندیراجاق.
یاشاسین گۆنئی آذربایجان!
یاشاسؽن تۆرکلوک و آذربایجانلؽلیق!
یاشاسین ۲۱ آذر میللی رۇحو!
گونئی آذربایجان جۆمهورییت پارتیاسؽ (آ.ج.پ)
۲۱ آذر – میللی دیرنیش گۆنو ۱۴۰۴ گۆنش تاریخی
۱۲ -۱۲-۲۰۲۵