گونئی آذربایجان جومهورییت پارتییاسی، ایران حاکیمییتینه باغلی مدیا اورقانلارینین سی اِن اِن -ین هئچ بیر دقیق ثبوتا اساسلانمایان، خبرینی بهانه گتیرهرک آذربایجان جومهورییتینه قارشی باشلاتدیغی علاقهلندیریلمیش تبلیغات و تخریبات کامپانیاسینی نؤوبتی اوغورسوز سیاسی و تهلوکهسیزلیک شوو تاماشاسی حساب ائدیر
.
سی اِن اِن -ین آدسیز و آنونیم قایناقلارا اساسلانان و آذربایجان جومهورییتینین رسمی تکذیبینه باخمایاراق یاییملانان خبری اطرافیندا یارادیلان کامپانیا گؤستریر کی، ایران حاکیمییتی اؤز سیاسی آماجلاری نامینه تصدیقلهنمهمیش معلوماتلاردان بئله ایستیفاده ائتمکدن چکینمیر. رسمی باکینین مؤوقعی آچیق شکیلده بیان اولونسا دا، ایران مدیاسی و اونا باغلی دایرهلر همین ایددیالاری گرچک کیمی تقدیم ائدهرک یئنی گرگینلیک یاراتماغا چالیشیرلار.
اوتوز ایل عرضینده ایشغالچی ائرمنیستانی سیاسی، ایقتصادی و موختلیف سویهلرده دستکلهین، آذربایجانین موستقیللیگینه و ارازی بوتؤولویونه قارشی دوشمنچیلیک مؤوقعی سرگیلهین، اؤلکهمیزده ترور و نارکوتیک شبکهلرینین فورمالاشدیریلماسینا شرایط یارادان، عئینی زاماندا آذربایجان تورکونون میللی کیملیگینه و وارلیغینا قارشی سیستملی و آردیجیل کیملیکسیزلشدیرمه و اریتمه سیاستی یوردن بیر رژیم، بو گون بؤلگهسل سیاستده اوزلشدیگی چوخسایلی اوغورسوزلوقلارین و درینلشن داخلی بحرانلارین تاثیری آلتیندادیر.
بو گون یئنیدن گوندمه گتیریلن کؤهنه و اساسسیز ایتیهاملار گؤستریر کی، آذربایجان جومهوریتینه قارشی آپاریلان تخریبات کامپانیاسینین اساس سببی ایسرائیل–آذربایجان موناسیبتلری و یا بؤلگهسل امکداشلیق دئییل.عکسینه، بو سیاستین کؤکونده ایران رژیمینین گونئی آذربایجاندا گوجلنن میللی آزادلیق حرکتیندن و فورمالاشان سیاسی ایرادهدن دویدوغو ناراحاتلیق دایانیر.
رژیم، گونئی آذربایجانداکی میللی حرکاتین آرتیق داها گئنیش ایجتیماعی و بؤلگهسل موستویده تاثیر گوجو قازاندیغینی گؤرور.ایران حاکمیتینی و عئینی پانایرانسیست دوشونجهنی بؤلوشون سؤزده موخالیفت دایرهلر قوزئی آذربایجانین گوجلنمهسینین گونئی آذربایجانداکی میللی و سیاسی پروسسلره وئردیگی تاثیردن جیددی ناراحاتلیق کئچیریرلر.
عئینی زاماندا آذربایجان جومهوریتینه قارشی آپاریلان قارالاما کامپانییالاری اصلینده گونئی آذربایجانداکی میللی حرکاتا قارشی باسقیلاری آرتیرماق، میللی فعاللارا قارشی یئنی ایتیهاملار ایرهلی سورمک و محدودلاشدریجی تدبیرلر اوچون زمین یاراتماق مقصدی داشیییر.دیگر طرفدن ایران، چوروموشلوک و درین بحران ایچینده اولان دؤولت سیستمینی گیزلتمک، اؤلکهنین ایقتصادی، سوسیال و سیاسی پروبلملرینین نظارتدن چیخماسینی اؤرت-باش دیر ائتمک، اؤلکه داخلینده آرتان ناراضیلیغی یؤنلندیرمک و ایجتیماعی دیقتی گرچک پروبلملردن یاییندیرماق اوچون خاریجی دوشمن نقشی فورمالاشدیرماغا چالیشیر.
آذربایجان جومهوریتینه قارشی آپاریلان تبلیغات دا بو سیاستین آیریلماز حیسسهسیدیر. سپاه و اونا باغلی دایرهلرین آذربایجان–ایسرائیل امکداشلیغی ایله باغلی سسلندیردیگی ایددیالار ایرانین بؤلگهسل سیاستده یاشادیغی اوغورسوزلوقلاری، سون ساواشدا (ایران–آمریکا و ایسرائیل) آلدیغی آغیر مغلوبیتلری، ژئو-سیاسی مؤوقعلرینین ضعیفلمهسینی و خاریجی سیاستده اوزلشدیگی گریلَمهلری گیزلتمک مقصدی داشیییر.بو یاناشما ایله رژیم، داخلدهکی طرفدارلارینی سفربر ائتمک و ایجتیماعییتین دیقتینی اؤلکهنین گرچک مغلوبیتلریندن یاییندیرماق اوچون ایستیفاده اولونور.رژیمین آذربایجان جومهوریتینه قارشی سرت سؤیلملرین آرتماسی، ۴۴ گونلوک وطن موحاریبهسیندن سونرا بؤلگهده فورمالاشان یئنی سیاسی رئالیقلاردان و قافقازدا ایتیریلمیش تاثیر ایمکانلاریندان قایناقلانیر.آذربایجان–ایسرائیل موناسیبتلری ایسه بو کامپانییادا یالنیز بهانه رولونو اویناییر. گونئی آذربایجان جومهوریت پارتیاسی بیان ائدیر کی، قورخو، نیفرت و دوشمنچیلیک اوزرینده قورولموش بو سیاست آرتیق تاریخی ایفلاسا اوغراییب.
گونئی آذربایجاندا گوجلنن میللی سیاسی ایراده و میللی اویانیش هئچ بیر تبلیغات و باسقی مئخانیزمی ایله دایاندیریلا بیلمز. بو گون تهرانین شووینیست رژیمینی ناراحات ائدن اساس مسئله موستقیل آذربایجان جومهوریتی دئییل، گونئی آذربایجاندا فورمالاشان میللی سیاسی شعور، خالقیمیزین اؤز تالئیینی معین ائتمک ایرادهسی و میللی یوکسلیش پروسسیدیر. آذربایجان جومهوریتینه قارشی آپاریلان کامپانییالار دا محض بو یوکسلیشی ضعیفلتمهیه یؤنلمیش داها گئنیش سیاستین ترکیب حیسسهسیدیر.بؤلگهنین گلهجهیی پانفارسیست و پانایرانسیست دایرهلرین پلانلاری ایله دئییل، ایراندا اساسرت آلتیندا یاشایان میللتلرین آزاد ایرادهسی و اؤز موقددراتینی تعیین ائتمک حقوقو اساسیندا فورمالاشاجاق.
گونئی آذربایجانداکی میللی آزادلیق ایستهی هئچ بیر تبلیغات، تضییق و یا سیاسی باسقی ایله دایاندیریلا بیلمز. بو، آرتیق گئری دؤنوشو اولمایان تاریخی-سیاسی پروسسدیر. گونئی آذربایجان خالقینین تالئیی تهرانین تهلوکهسیزلیک قوروملارینین پلانلاری ایله دئییل، خالقین اؤز ایرادهسی ایله معین اولوناجاق. بیز آزادلیق، عدالت، دموکراتییا و میللی دؤولتچیلیک ایلکهلری اوغروندا موباریزهمیزی قطعیتله داوام ائتدیرهجییک
گونئی آذربایجان جومهورییت پارتییاسی**۱۰-۰۶-۲۰۲۶
