ایران ایشغالچی دؤولتچیلیغی ۱۰۰ ایلدن بریدیرکی ، ایران آدلانان سیاسی جغرافیادا غئیری-فارس میللتلرین بوتون میلّی، سیاسی و اینسانی حاقلارین پوزماقدادیر .
سون زامانلاردا اؤز ایشغالچیلیق و سؤمورگچیلیک سیاستلری آذربایجان میللتینین دیره نیشی ایله قارشی-قارشییا گلینجه رئژیم داها شدّتلی شکیلده آذربایجان میللتینه و اونون میلّی وارلیقلارینا سالدیریر.
بو باغلامدا سون آیلار ابراهیم رشیدی ساوالان یوروش مهرعلی بیگلو اوزون مدتلی و سببسیز توتوقلانمیشدیر.
حال حاضردا ودوداسدی ، سعیدمینایی، اسماعیل احمدی، صالح ملا عباسی ، طاهیرنقوی، آرازآمان، آیاز سیف‌خواه، باقیرحاجیزاده، سعیدجمالزاده ، عبدالله واحیدی، سالار طاهیرافشار ، عظیمی قدیم کمال نوری ، مرتضی پروین و بیر چوخ آدلاری بللی اولمایان میلّی فعالیمیز توپلو شکیلده حبس ائدیلیب و بیر چوخ میلّی فعال قوندارما محکمه‌لره چاغریلیب و همین محکمه‌لرده دوزمجه دلیللر اساسیندا آذربایجان فعاللارینا آغیر جزالار وئریلیب.
ایران رئژیمینین کئچن آیلاردا گونئیده آذربایجان میلّی فعاللارینا قارشی باسقیلارینین آرتیرماسی ، آذربایجانلیلارین ایش یئرلری و ائولَرینه قانونسوز باسقینلاری، آذربایجان فعاللارینین عائله‌‌لرینه سالدیرمالاری، اونلارا اجتماعی، اقتصادی و فیزیکی ایشگنجه لره معروض قویماسی گؤستریر کی:
۱- ایران دؤولتینین آذربایجان میللَتینه قارشی آچدیغی ساواش و دوشمنچیلیک یئنی و شدّتلی دؤوره کئچمکده دیر . ایران رئژیمی بو یئنی دؤنَمین آچیق مئساژینی وئریر .بو دؤنم آزربایجان میللی حرکاتینا هر طرفلی باسقیلار داها دا آرتاجاق .
۲- ایران مولّا رئژیمی آذربایجان میلّی حرکاتینین آذربایجان میلله تینین آراسیندا،یاییلماماسینی آذربایجان حرکاتینین ایراندا دیگر خالقلارا سیاسی تأثیر بوراخماماسی اوچون بیر قورخو آتموسفئرینی یارادیر. رئژیم میلّی فعاللارا وحشیجه داورانیب و پسیخولوژی باسقیلار یارادماقلا ، اصلینده آذربایجان میلّی حرکاتینین ایچَریسینده اومیدسیزلیک و قورخو هاواسی یارادیر، بئلجه حرکاتین تشکیلاتلانماسینی، یاییلماسینی, ائلجده نفوذ و ایرلیله ییشینی اؤنلَمک ایسته ییر .
۳- رئژیم بوتون توتوقلامالاری وحشیجه حیاتا کئچیریر و توتوقلانانلارین حاقیندا ، سببلری حاقدا محبوسلارین ساغلیق دوروملاری حاقیندا، اجتماعییته و حتی اونلارین عائله‌‌لرینه هئچ بیر بیلگی وئرمیر .
رئژیم اصلینده آذربایجان میلّی حرکاتینا قارشی دوشمنچیلیغینده هئچ بیر سینیر تانیمایاجاغینی ، حرکاتا قارشیلیق وئرمکده هئچ بیر قانون و قایدایا اویمایاجاغینی، اخلاقی و ویجدانی ديَرلری آیاقلار آلتینا آلاجاغینی، آذربایجانلیلارا قارشی حتی اؤز آنا یاسا قانونلارینی کوبود پوزاجاغینی آچیق بیلدیریر
۴- ایران مولّا رئژیمی گونئی آذربایجان میلّی حرکاتینین وارلیغی سببی ایله ۳۰ ایلدیر آذربایجان جومهورییتینه هر ساحه‌‌ده ساواش آچیب .
آنجاق ایران آذربایجان دؤولتچیلیغینه آچدیغی بوتون ساواشلاردا مغلوب اولوب .
قاراباغدا آذربایجانین بؤیوک ظفری و ایرانین قافقازدان آتیلماسینی، ایران دولتی هله قبوللانا بیلمیر .
ایرانین آذربایجان دؤولتچیلیغینی ضعییفلَندیرمک اوچون ۳۰ ایل عرضینده یاراتدیغی بوتون دینی و سیاسی تخریبات و جاسوسلوق شبکله ری بیر- بیر چؤکوب. عینی زاماندا ایرانین بؤلگده آپاردیغی “شيعه هیلالی” سیاستی یانلیز آذربایجاندا اوغورسوز اولوب.
دیگر طرفدن قوزئی آذربایجاندا،《جومهورییتچیلیک ، دؤولتچیلیک و آذربایجانچیلیق》 “ديَرلَرینین سرعتله یوکسلمسی و صاحبلنمه سی و بو یوکسه لیشین آذربایجانین گونئیینده منیمسنمسی و سرعتله میلّی دویغولارین کؤروکلنمسی، بونونلا بیرگه آذربایجان دؤولتینین گونئی ده اولان آذربایجانلیلارین دؤولتچیلیک سويّه‌سینده قایه سینده قالاجاغینین آچیقلامالاری گونئی – قوزئی آراسیندا اولان باغلاری داها دا ساغلاملاشتیریب و بودا ایرانی دا داها چوخ قایقیلاندیریب .
آرتیق موستقیل آذربایجانین گوجلنمسی و هر طرفلی گلیشمسی، آذربایجان دؤولتینی بؤلگده گوجون و باشارینین سیمگه سینه چئورییب. بوتون بونلار ایران رئژیمینی داها دا اوغورسوز و عصبی ائدیب محض بونون اوچون ایران دؤولتی آذربایجان میلّی حرکاتینا و آذربایجان جومهورییتینه قارشی موختلیف ساحه‌‌لرده آپاردیغی دوشمنچیلیک و تخریبات زمینلرینی آرتیق بیرلَشدیرمک ایستَییر و اصلینده ایران هر ایکیسینی(گونئی و قوزئی گوجلری) عینی ساواش زمینینه چکمیه چالیشیر .
سون توتوقلانان میلّی فعاللارین بیر نئچه سینی قارالایاراق آذربایجان دؤوله تینین آژانی دامغاسینی وورماسی بو سیاستین ایجراسینین آچیق اؤرنییدیر ایران رئژیمی بوندان،سونرا آذربایجان میلّی حرکاتینین عضولرینی آذربایجان دؤولتینه باغلایاجاغینی ، حرکاتچیلارا داها دا آغیر داورانیش گؤسترجیینین مئساژینی وئریر
۵- ایران دؤولتی، گونئی آذربایجان میلّی حرکاتینا و آذربایجان دؤولتینه آتدیغی بؤهتانلارایله ،اصلینده قوزئی آذربایجاندا توتوقلانان اؤز تئررورچولارینا آلیش وئریش یولو آچماق تشبّوثونده دیر
۶- ایران مولّا رئژیمی ، سون توتوقلانانلاری آذربایجان جومهورییتینه باغلاماسی ایله عینی زاماندا اؤزونون ایرانچی و فارس میللتچیسی بیر دؤولت اولدوغونو گؤستریر.
“ آذربایجان دؤولتی ایرانی پارچالاماق ایسته ین بیرتهلوکه‌‌دیر ” هاواسی یاراداراق ایرانچی فارس اوپوزیسییونونو دا میلّیّتچی دویغولار اطرافیندا بیرله شدیریر و اؤز یانینا چکیر. ایران رئژیمی گونوموز پان ایرانیسم دوشونجه نین شعوبییه تمثیلچیسی اولاراق آذربایجان دؤولتینی و آذربایجان میلّی حرکاتینی ایرانین وارلیغینا بؤیوک تهلوکه کیمی هدف تاختاسیندا اوتورتماق ایستییر .
گونئی آذربایجان جومهورییت پارتییاسی(آ.ج.پ) اولاراق میللتیمیزین و وطنیمیزین میلّی مسئله‌لری و حاقلارینین کئشیکچیسی اولاراق بو قوتسال داوادا جانیندان کئچن میلّی فعاللاریمیزین سسی اولاجاغیمیزی و ایران دؤولتینین بوتون ایشغالچیلیق ،آسیمیلاسیون، باسقی سیاستلَرینین و سالدیریلارینین قارشیسیندا دوراجاغیمیزی بیلدیریریک.
آ.ج.پ اولاراق بوتون آذربایجان میللتینی بو مسئله‌لره سسسیز قالماماغا، میلّی حرکاتیمیزی و دؤولتچیلیییمیزی ایران شر و ایشغال رئژیمینه قارشی مودافیعه چی اولماغا چاغیریریق . میللتیمیزین اویانیشی و بیرلشمسی ایرانین تاریخی آذربایجان تورپاقلاریندا نا مشروع و ایشغالچی دؤولتچیلیغینی ییخاجاغینا تام اینامیمیز وار .
گونئی آذربایجان جومهوریییت پارتییاسی- آراشدیرما مرکزی – تبریز
۴ اسفند ۱۴۰۲