حؤرمتلی سویداشلاریمیز
اوجا آذربایجان تورک میللتی
۳۱ دئکابر آذربایجان تاریخینده ۵۰ میلیونلوق اوجا میللتیمیزین میلّی هم-رأی-لیک و دایانیشماسینی دونیایا عکس ائتدیردیغی گوندور .
دربندن باشلاماقلا، همدانا اوزانان آنا وطنیمیز بؤیوک آذربایجان، سون ۲۰۰ ایلده واحید ایداره’چیلیکدن اوزاقلاشماقلا کیچیک دؤولت شکیلینده خانلیقلارا بؤلونموش آردیندان وطنیمیز ۱۸۱۳-جو ایلینده گولوستان و ۱۸۲۸-جی ایلینده ایسه تورکمنچای آنلاشمالاری ایکی حیصّه‌‌یه قوزئی و گونئی آذربایجانا بؤلونموشدور .
عزیز باجی و قارداشلاریمیز
۲۰۰ ایله یاخیندیر کی وطنیمیزی اؤز تأثیری آلتینا آلمیش ایشغالچی قوووه لره قارشی میللت اولاراق یوز ایللرله بویوک دیره نیشلر گؤسترَرَک موجادیله لر وئرمیشیک.
۱۹۸۹ جو ایل آذربایجانین قوزئیینده یئنیدن باشلانمیش میلّی اویانیش حرکاتی، همین ایلین دئکابر آیی(دی آیی) آراز بویو ایشغالچی سووئت قوشونلارینا قارشی بؤیوک موجادیلیه دؤنوشدو .
نتیجده آراز چایی بویونجا آذربایجانی ایکییه بؤلموش، آیریلیق سدللری ۳۱ دئکابر-۱۹۸۹ جو ایلده(۱۰ دی ۱۳۶۷) میلّی ایراده میزین گوجو ایله سؤکولوب آتیلمیشدیر.
بئلجه، بو حرکاتلا بیرلییغیمیزه یول آچان ۳۱ دئکابر دونیا آذربایجانلیلارینین میلّی هم رأی لییغینین تملی قویولموشدور.
آرتیق او گوندن باشلایاراق تبریز ، باکی ، ماکی ، زنجان ، زنگیلان، ناخچیوان ، اورمیه ، قوبا، سولدوز ، گنجه ، شاماخی ، قزوین ، آستارا ، جلفا، سالماس, اردبیل و سایر شهر و کندلَریمیز-بیر بیری ایله قوجاقلاشاراق قایناییب قاریشمیشدیر .
بیز آذربایجان جومهوریتچیلری، بو تاریخی حادثه‌‌نی عزیزلَمکله سیزلری بوتؤو آذربایجان میللتی اولاراق ۳۱ دئکابر دونیا آذربایجانلیلارینین میلّی هم رأی لیک و دایانیشما گونو موناسیبتی ایله تبریک ائدیریک سیزه میلّی هم رأی-لیکله باشلانمیش میلّی موجادیله یولوموزدا گونئی آزربایجانین باغیمسیزلیغین قدر یورومک ديَانتی و بوتؤو آذربایجانا صاحب اولماق قودرتی آرزولاییریق .
عزیز سویداشلاریمیز ، اولو ستّارخانین، باقیرخانین، شیخ محمّد خیابانینین، میرجعفرپیشه ورینین، محمّد امین رسولزاده نین، ائلجه ده قوزئی آذربایجانیمیزدا شرقین ایلک جومهورییت ديَرلَرینی یاراتمیش اونلارلا لیدئرین و میلّی حرکاتیمیزین اون مینلرله قهرمان شهیدلرینین عزیز روحلاری بو گون بیزلردن میلّی حرکاتیمیزا یئنیدن صاحب چیخماغی و بو حرکاتی گونئی آذربایجانین باغیمسیزلیغینا و آزربایجان دولتیمیزی قورانادَک گؤتورمغی گؤزلَمکده دیر .
عینی زاماندا، آذربایجان دؤولتینین محترم رئیس‌جمهورو ، جناب ایلهام علییئوین فرمانی ایله۲۰۲۴-جو یئنی میلادی ایلینین “آذربایجانلیلارین هم-رأی-لیک و بیرلیک ” ایلی قئید اولونماسی میللتیمیزین بیرلییغینین واجیبلیغینی، داها دا اُؤنملی و ديَرلی آنلام قازاندیرماقدادیر .
بیز جومهورییت عاشقلری موختلیف آدلار آلتیندا میلّی حرکاتیمیزا قاتقی (فایده و قازانج) ساغلاماغا چالیشان بوتون میلّی حرکاتچیلاریمیزا بو قوتسال گون موناسیبتی ایله بیر داها موراجعت ائدیریک .
بابالاریمیزدان بیزلره میراث قالمیش میلّی حرکاتیمیزی اؤز دوغرو هدفینه یئتیشدیرمک اوچون، بوتون فیکیر آیریلیقلاریمیزی کنارا قویماغی باجارمالییق.
میلّی منفعتلریمیزی، اؤز شخصی و تشکیلاتی منفعتلریمیزدن اوستون توتماغی اؤیرنملییک.
یئنیدن میلّی هم-رأی-لیک نمایش ائتدیرَرک یوردوموزون بیرلیغی و بوتؤولویو اوغروندا-اَل اَله وئریب گونئیده آذربایجانیمیزین باغیمسیزلیق موجادیله سینین سون ساواشینی باشلاتمالییق.
میلّی قورتولوش موباریزه سینده بیرلیک و بوتؤولوغوموزو بیر میللت کیمی قوروماقدا ماراقلی اولمالییق .
بوتون وطن‌سئور قووه لریمیز و میلّی قوووه لریمیز آراسیندا ایختیلافا یول آچان رقابتلَرین و یا قطبلانمالار و بلوکلار یارانماسیندان، اوزاق دورمالییق .
نیه کی گونئی ده آزربایجانین باغیمسیزلیغی میلّی حرکاتچیلاریمیزین میلّی بیریلیک و هم-رأی-لیغیندن کئچیر .
آزربایجانین بوتؤولوغونو برپا سی اوچون ، قوزئی ده اولان میللتیمیزین ، گونئیده آذربایجان ایستیقلالییتی و بوتؤولویو اوچون موباریزه آپارانلارا، یول یولداشی اولماغیدان کئچیر .
۵۰ میلیونلوق آذربایجان اوچون میلّی بیرلیک و هم-رأی-لیک اولارسا، اَن قیسا زاماندا جُغرافیامیزدا موطلق میلّی دیریلییغیمیز’ده مؤوجود اولاجاقدیر.
بو یول ایسه بو گونوکی تاریخی گونله هم آهنگ و اویوملو اولاراق میلّی هم رأی-لیکله باشلانیر.
میلّی هم-رأی-لیکله باشلانان موجادیله نین موطلق سوندا هدفینه یئتدیغینی ، بیزلر یاخین کئچمیشیمیزده قوزئی آزربایجاندا هم میلّی آزادلیق حرکاتی زامانی ، همده ۴۴ گونلوک قاراباغین آزادلیغی اوغرونداکی ساواش زامانی شاهیدی اولموشوق.
بونون اوچون بیز جومهورییت عاشقلری و قورتولوش موجادیله چیلری اولاراق بو قایَیه(تلاشا) اینانیر و میللَتیمیزی بو همرأی-لیک گونونده میلّی بیرلیغه سسلَییریک .
بیز ۵۰ میلیونلوق آذربایجانین وطن اؤولادلاری هله-لیک جیسماً آیری یاشاماغا محکوم اولساقدا، روحاً هئچ زامان آیریلمامیش، دایماً بیر و بوتؤو اولموشوق .
بوتؤولوغون یولوندا میلّی هم رأی-لیغین قوتلو اولسون ای شانلی آذربایجان!!
میلتیمزه دَرین حؤرمتله
گونئی آذربایجان جومهورییت پارتیسی(آ.ج.پ)
۱۴۰۲ گونش ایلینین چیلله آینین ۹ جو گونو( دی آیی)